ኢትዮጵያ በ80 አመታት ታሪኳ ለመጀመሪያ ጊዜ መሪዋን በብሔራዊ ስነ ስርዓት በክብር ቀበረች

prime-minster-mels-zenawi

(በፍቃዱ በየነ) ላለፉት 21 አመታት ኢትዮጵያን ሲመሩ የነበሩት ጠቅላይ ሚኒስትር መለስ ዜናዊ ምንነቱ ባልተጠቀሰ ህመም ምክንያት ከዚህ አለም በሞት ከተለዩበት ቀን አንስቶ ባሉት 12 ቀናት በመላው ሀገሪቱ ብሔራዊ የሀዘን ቀን ታውጆ ህዝቡ በያለበት ሀዘኑን ሲገልፅ ቆይቷል፡፡

የጠቅላይ ሚኒስትሩ ድንገተኛና ያልተጠበቀ ህልፈተ ህይወት የፈጠረው ስሜት የሀገሪቱን ድንበር ጥሶ ወደ ተለያዩ ሀገራትም ዘልቆ ነበር፡፡ ለአብነትም ደቡብ ሱዳን የሶስት ቀናት ብሔራዊ የሀዘን ቀን ማወጇን መጥቀስ ይቻላል፡፡

በእርግጥ ጠቅላይ ሚኒስትር መለስ ደቡብ ሱዳን በሰላም ራሷን ችላ በሁለት እግሯ እንድትቆም ያደረጉ መሪ ነበሩ፡፡ የአሜሪካዊቷን ሱዛን ራይስ አገላለፅ ልዋስና ጠቅላይ ሚኒስትሩ የአለማችን አዲሲቷ ሀገር ደቡብ ሱዳን ሪፐብሊክ ስትወለድ አዋላጅ ነርስ ነበሩ፡፡ “PM Meles was midwife to the birth of the world’s new state, the republic of south Sudan”

“Meles is both a son of Ethiopia and the father of its rebirth” ሲሉም ተደምጠዋል ወይዘሮ ሱዛን ራይስ የቅርብ ጓደኛዬ ነበሩ ባሏቸው ጠቅላይ ሚኒስትር መለስ ሞት ሀዘን እንባ እየተናነቃቸው በመስቀል አደባባይ በህዝብ ፊት ባሰሙት ንግግር፡፡

የኡጋንዳው ፕሬዚደንት ዩዌሪ ሙሴቬኒ « ሁላችንም እንሞታለን፤ ጥያቄው ግን ምን አስተዋፅኦ አድርገናል የሚለው ነው» በማለት ነበር ጠቅላይ ሚኒስትር መለስ ለኢትዮጵያና ለአፍሪካ በርካታ ስራዎችን ሰርተው ማለፋቸውን የገለፁት፡፡

12 ሰዓታትን የፈጀው የጠቅላይ ሚኒስትሩ ብሔራዊ የቀብር ስነ ስርዓት በሀገሪቱ ብሔራዊ የቴሌቪዥን እና ሬዲዮ ጣቢያዎች በቀጥታ ተሰራጭቷል፡፡ በማርሽ ባንድ፣ በመከላከያና በፌዴራል ፖሊስ አባላት ወደ መስቀል አደባባይ ለመጨረሻ ጊዜ የወጣው የጠቅላይ ሚኒስትሩ አስከሬን በመጣበት አኳኋን ተመልሶ ወደ ቅድስት ስላሴ ካቴድራል በማምራት ግብዓተ መሬቱ ተፈፅሟል፡፡ ይህንኑም በማስመልከት 21 ጊዜ መድፍ ተተኩሷል፡፡

ኢትዮጵያውያን እ.ኤ.አ በ1930 የወቅቱ መሪ የነበሩትን ንግስት ዘውዲቱን በክብር መቅበራቸው የሚታወስ ነው፡፡ ከእሳቸው በመቀጠል መንበረ ስልጣኑን የተረከቡት ቀዳማዊ አፄ ኃይለስላሴ ግብዓተ መሬት አፈፃፀምን በተመለከተ እንኳንስ ህዝቡ በነቂስ ወጥቶ ሊቀብራቸው ይቅርና የት እንኳን እንደተቀበሩ በግልፅ የሚታወቅ ነገር የለም (እድሜ ለደርግ)፡፡

Comments

comments

Leave a Reply

Your email address will not be published.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>